Mikunhod ubos sa 30,000 units ang baligya sa mga sakyanan sa Pilipinas niadtong Agosto tungod sa dili maayong dagan sa panahon, human misaka pa unta ang sales niadtong Hunyo ug Hulyo.
Sumala sa datos sa Chamber of Automotive Manufacturers of the Philippines Inc. (Campi) ug Truck Manufacturers Association (TMA), 29,611 ka mga sakyanan ang nabaligya niadtong Agosto, mas ubos kun itandi sa 36,174 units sa samang bulan niaging tuig.
Mikunhod usab og 20 porsyento ang sales sa commercial vehicles ngadto sa 22,827 units, samtang ang passenger cars mikunhod og 10.6 porsyento ngadto sa 6,784 units. Sa Enero hangtod Agosto, mikunhod og 11.1 porsyento ang kinatibuk-ang sales ngadto sa 271,336 units.
Bisan pa sa pagkunhod, nagpabiling kusog ang baligya sa electrified vehicles. Sa Agosto, misaka og 214.9% ang sales niini ngadto sa 7,066 units, samtang sa Enero hangtod Agosto, misaka og 146.2 porsyento ngadto sa 45,403 units.
Ang hybrid electric vehicles maoy labing pinili sa mga konsumidor nga adunay 23,764 units nga nabaligya, gisundan sa battery EVs nga 12,883 ug plug-in hybrid EVs nga 8,756 units.
Matud sa Campi, nagpabilin silang positibo nga makabawi ang industriya sa nahabiling mga bulan sa 2026, ug giisip ang pagkunhod sa Agosto nga temporaryong epekto sa dili maayong dagan sa panahon.
Photo Courtesy: AutoDeal
