Gilauman nga mas molapad ang oportunidad sa mga negosyanteng Pilipino sa internasyonal nga merkado pinaagi sa umaabot nga ASEAN Digital Economy Framework Agreement o DEFA nga nagtumong sa pagpasayon sa pagbaligya sa mga produkto ug serbisyo sulod sa Southeast Asia.
Sumala kang Trade Secretary Ma. Cristina Roque gitakdang pirmahan sa Nobyembre 14 ang maong kasabutan nga gilauman nga makatabang ilabi na sa mga micro, small and medium enterprises o MSMEs pinaagi sa pagpakunhod sa gasto ug mga babag sa cross-border online transactions.
Gilauman usab nga moabot sa 2 hangtod 3 trilyong dolyar ang potensyal nga kantidad sa digital economy sa ASEAN sa tuig 2030.
Matud pa ni Roque sugdan sa gobyerno sa Enero sa sunod tuig ang mas aktibong kampanya aron matabangan ang mga lokal nga negosyo nga mapahimuslan ang maong oportunidad ug makasulod sa mas lapad nga merkado sa rehiyon.
Ang DEFA kabahin sa paningkamot sa mga nasod sa ASEAN nga palig-onon ang digital trade electronic payments ug e-commerce sa Southeast Asia
Photo courtesy:ASEAN 2026
