Gilusad sa Lupon District Jail ang ilang unang Pickleball Tournament isip kabahin sa pagpasiugda sa panaghiusa, kahimsog ug pagpalig-on sa serbisyo sa komunidad. Gipahigayon ang duha ka adlaw nga torneyo sa Norberto’s Pickleball Court sa Barangay Rang-ay, Banaybanay, Davao Oriental niadtong Nobyembre 7 hangtod 8, 2026.
Gipangulohan ang maong kalihokan ni JSINSP Christian Paul A. Monterola, District Jail Warden, uban sa aktibong suporta ni JCINSP Sweety Jel Leonor Roullo, Provincial Jail Administrator. Nagtapok sa maong aktibidad ang mga magdudula gikan sa nagkalain-laing ahensya sa gobyerno ug mga kaabag nga organisasyon, diin nahimo kining oportunidad aron mapalig-on ang panag-uban ug kooperasyon tali sa mga ahensya ug pagpalig-on sa panglawas.
Ang maong kalihokan dili lamang kompetisyon sa isports, kondili usa usab ka fund-raising initiative diin ang tanang nakolektang kwarta ug sponsorship gitagana alang sa mga programa nga nagtumong sa kaayohan, rehabilitasyon ug kalamboan sa mga Persons Deprived of Liberty kun PDL.
Nagpahayag usab og pagpasalamat ang mga tig-organisar ngadto sa tanang partisipante, sponsor ug mga tigpaluyo, human nga nahimong malampuson ang maong kalihokan.
Photo courtesy: LDJ
