Miabot sa 23 ka mga institusyon sa Pilipinas, lakip ang mga ahensya sa gobyerno, kapulisan, militar, ug mga eskwelahan, ang nailalom sa sunod-sunod nga cyberattacks ug pagkatag sa pribadong impormasyon.
Base sa assessment sa cyber security monitoring group nga Deep Web Konek, milyon-milyong personal, pangnegosyo, ug administratibong rekord ang nakumpromiso ug gipagawas sa dark web ug mga online forum sa mga hacker. Lakip sa mga ahensiyang nalista sa report ang Office of the Vice President, Bureau of Internal Revenue, Department of Information and Communications Technology, Department of Labor and Employment, Philippine Coast Guard, ug Land Transportation Office, apil na ang pipila ka unibersidad diin nakuha ang mga datos sa mga estudyante ug rekord sa panalapi.
Gikumpirma usab sa Securities and Exchange Commission (SEC) ang posibleng pagtagas sa impormasyon sa ilang mga tiggamit ug giawhag sila nga mag-ilis og password, mag-scan sa ilang mga gadyet, ug magbantay batok sa mga kadudahang mensahe. Gipasiugda sa maong insidente ang dinalian nga panginahanglan nga palig-onon ang seguridad sa mga digital system aron mapanalipdan ang pribadong datos sa publiko.
Photo courtesy:Deep Web Konek/Gadget Pilipinas
