Nadakpan sa kapulisan ang usa ka lalaki nga giila nga wanted person tungod sa paglapas sa municipal ordinance kalabot sa dili pagsul-ob og helmet samtang nagmaneho og motorsiklo sa lungsod sa Naga, Zamboanga Sibugay.
Base sa report sa Zamboanga Sibugay Police Provincial Office, nahitabo ang pagdakop pasado ala-una baynte singko sa hapon niadtong Nobyembre onse, pinaagi sa operasyon nga gipahigayon sa mga personnel sa Naga Municipal Police Station.
Gidakop ang maong lalaki pinaagi sa Warrant of Arrest tungod sa paglapas sa Article 3, Section 78 sa Municipal Ordinance Number 01-329-2014, nga nagdili sa pagdrayb nga walay helmet. Ang maong kaso adunay girekomendar nga piyansa nga mokabat sa usa ka libo ka pesos.
Human sa pagdakop, gipahibalo ang suspek sa hinungdan sa iyang pagkadakop ug gipahibalo usab sa iyang mga katungod isip akusado. Sa pagkakaron, anaa na siya sa kustodiya sa Naga MPS alang sa tukmang disposisyon sa iyang kaso.
