Nadakpan sa kapulisan ang 3 ka indibidwal atol sa pagpatuman sa Search Warrant may kalabotan sa paglapas sa Republic Act 9165 o Comprehensive Dangerous Drugs Act of 2002, alas 10:15 sa buntag niadtong Nobyembre 11, 2026, sa lungsod sa Naga, Zamboanga Sibugay.
Ang mga nadakpan naglangkob sa usa ka 32 anyos nga lalaki ug duha ka babaye nga nag-edad og 37 ug 29 anyos. Gipahigayon ang operasyon sa Regional Drug Enforcement Unit o RDEU Zamboanga Sibugay Team, kauban ang Naga Municipal Police Station, PDEU ZSBPPO ug ubang police intelligence ug law enforcement units.
Narekober sa operasyon ang 774 ka heat-sealed transparent plastic sachets nga adunay sulod nga gituohang shabu, nga may gibug-aton nga mokabat sa 500 gramos ug adunay Standard Drug Price nga mokabat sa 3.4 million pesos. Nakuha usab ang usa ka digital weighing scale, brown bag ug mga cellphone nga giisip nga non-drug evidence.
Gipahigayon ang pagpangita sa balay sa presensya sa duha ka mga saksi gikan sa media ug usa ka piniling opisyal sa barangay, lakip na ang mga suspek ug uban pang nagpuyo sa maong balay. Gipahibalo usab ang mga nadakpan sa ilang mga katungod isip mga dinakpan ug sa matang sa ilang giatubang nga kalapasan.
Gidala ang tulo ka suspek sa Naga MPS alang sa tukmang disposisyon ug ipailalom sa medical examination sa DGTH Medical Center sa Tenan, Ipil. Samtang giandam na ang kasong paglapas sa RA 9165 nga ipasaka batok kanila sa korte.
