Nagpadayon sa City Health Office sa Iligan ang paghatag og libreng routine immunization alang sa mga masuso ug batang nag-edad og zero hangtod 59 ka bulan.
Lakip sa mga bakunang libre nga gihatag ang BCG, Hepatitis B, Pentavalent, OPV, IPV, PCV ug MMR, subay sa edad, vaccination history ug girekomendar nga iskedyul sa pagbakuna sa matag bata.
Matud sa CHO-Iligan, nga sukad pa niadtong Abril 2026, hurot na ang stock sa PCV10 vaccine ug gipatin-aw sa buhatan nga ang pagpalit ug pag-apod-apod sa mga bakuna ubos sa National Immunization Program gidumala sa Department of Health Central Office, busa nagdepende ang lokal nga panggamhanan sa ilang suplay.
Padayon nga gi-awhag sa CHO-Iligan ang mga ginikanan nga ipadayon ang ubang bakuna sa ilang mga anak ug moduol sa pinakaduol nga barangay health center dala ang immunization card aron masusi ang mga bakunang angay na o wala pa makuha sa bata.
Photo courtesy: CHO-Iligan
