Gilusad sa Dipolog City Police Station ang “Oplan Kuyog Ta,” usa ka 14-day Barangay-PNP Community Mobilization Against Illegal Drugs and Criminality, nga gipahigayon sa Relocation Site Covered Court, Barangay Olingan, Dipolog City adlawng Huwebes, Nobyembre 12, 2026.
Gidala sa maong programa ang temang “Barangay ug Kapulisan, Magkuyog Alang sa Luwas, Hapsay ug Drug-Free nga Komunidad.” Gitambongan kini ni PLTCOL Khisna B. Asaali, hepe sa Dipolog City Police Station; PCOL Reydante E. Ariza, Zamboanga del Norte Police Provincial Director; Pastor Ramilo Avenido; mga opisyal sa Barangay Olingan nga gipangulohan ni Kapitan Francisca Maquiling; ug mga residente sa komunidad.
Sa welcome message, gipasiugda ni Kapitan Maquiling ang kamahinungdanon sa aktibong partisipasyon sa mga residente aron molampos ang programa ug mahimong kaabag sa pagmintinar sa kalinaw ug kahapsay sa ilang barangay. Naghatag usab og mensahe sa suporta ang DILG pinaagi ni Lea Mica Recososa, nga mirepresentar ni City Local Government Operations Officer Sherrie Charlota N. Machutes.
Samtang sa mensahe sa lokal nga pangagamhanan, nga gipahayag ni Atty. Elro Mar Tabiliran isip representante ni Dipolog City Mayor Roberto Y. Uy, gipasiugda nga ang pagpakigbatok sa ilegal nga droga ug kriminalidad dili lamang responsibilidad sa kapulisan ug gobyerno, kondili nagkinahanglan usab sa kooperasyon ug panaghiusa sa matag miyembro sa komunidad.
Gipasabot usab ni PLTCOL Asaali ang maong programa gipasiugdahan ni ZNPPO director PCOL Ariza. Sa laing bahin, gipasiugda ni PCOL Ariza nga ang Oplan Kuyog Ta usa ka bloodless campaign batok sa ilegal nga droga ug kriminalidad, diin gihatagan og dakong gibug-aton ang panaghiusa, pagkooperar sa komunidad ug malinawon nga pamaagi sa pagmintinar sa kalinaw ug kaluwasan.
Pinaagi sa 14 ka adlaw nga community mobilization, gitinguha nga mas mapalig-on ang koordinasyon tali sa kapulisan, mga opisyal sa barangay ug mga residente sa pag-ila ug pagtubag sa mga problema nga may kalabotan sa ilegal nga droga ug kriminalidad.
Gipasiugda sa maong kalihokan nga ang kalinaw ug kaluwasan dili lamang trabaho sa mga otoridad. Nagkinahanglan kini sa panaghiusa ug responsableng partisipasyon sa matag pamilya ug residente aron matukod ang usa ka komunidad nga luwas, malinawon ug layo sa hulga sa ilegal nga droga ug mga kriminalidad.
