Labaw pa sa usa ka Christmas celebration, ang maong panagtigom nahimong simbolo sa pagpasalamat, pag-ila ug pagpalig-on sa relasyon tali sa kompanya ug sa mga dealers ug coordinators niini—usa ka makahuluganon nga paagi sa pagsaulog sa Pasko nga nagpalig-on sa panaghiusa ug naghatag og bili sa matag usa.
Gipahigayon karong Nobyembre 12, 2026, sa Kidapawan City Gymnasium ang Dealers and Coordinators Christmas Party 2026, nga naghiusa sa mga dealers, coordinators ug mga bisita sa usa ka selebrasyon nga puno sa kalipay, panaghiusa ug tinuod nga diwa sa Pasko.
Ang maong kalihokan gipangunahan ni RSV Group of Companies President and CEO Mr. Richard S. Villaronte, uban nila RSV Broadcasting Network Incorporated Vice President for Operations Ms. Maria Luz Egdane-Agsaluna ug RSV Lifecare Marketing Incorporated Vice President for Operations Ms. Cherelyn Bautista-Israel.
Sa iyang mensahe, gipasiugda ni Mr. Villaronte ang kamahinungdanon sa pagpalig-on sa panaghiusa, pagtinabangay ug paghigugmaay, ilabina niining panahon sa Pasko. Iyang gipahinumdoman ang tanan nga ang tinuod nga diwa sa selebrasyon dili lamang makita sa mga gasa ug kalipay, kondili sa pagpaambit, pagpasalamat ug paghatag og bili sa matag usa.
Dugang sa kasadya sa maong kalihokan, gikalipay usab sa mga partisipante ang mga giveaways nga ilang nadawat, lakip ang mga bag, T-shirt ug kalendaryo isip handumanan sa maong selebrasyon.
Usa sa mga nag-unang highlight sa kalihokan mao ang live drama presentation sa mga dramatista sa Juander Radyo Drama Production Center. Dako ang emosyonal nga epekto sa maong pasundayag diin ang mga dealers, coordinators ug mga bisita personal nga nakasaksi sa talento ug husay sa mga dramatista. Ang ilang makahuluganon nga pag-arte nakapukaw sa pagbati sa mga nanan-aw, nga nagpamatuod nga ang drama dili lamang tinubdan sa kalingawan, kondili usa usab ka epektibong paagi sa paghatod og mga mensahe nga makatandog sa kasingkasing.
Mas misamot pa ang kahinam sa selebrasyon pinaagi sa raffle draw diin gipanghatag ang dagkong premyo sama sa motorsiklo, speaker ug telebisyon, nga nakadugang sa excitement ug kalipay sa tanang mitambong.
Ang maong kalihokan nahimong posible pinaagi sa hiniusang paningkamot sa tibuok pwersa sa RSV Group of Companies, ilabi na sa Juander Radyo Lights and Sounds Team, sa pakigtambayayong sa Juander Radyo Kidapawan Team.
