Nakauli na sa iyang mansyon sa Kuala Lumpur si kanhi Malaysia Prime Minister Najib Razak, 73 anyos, aron ipadayon ang nahabiling duha ka tuig sa iyang sentensiya tungod sa korapsyon.
Giubanan og armadong kapulisan si Razak sa iyang pagbalik gikan sa prisohan human makombikto sa pag-abuso sa gahum, money laundering ug paglapas sa pagsalig kalabot sa iskandalo sa 1MDB investment fund.
Gibanabana sa mga imbestigador nga mokabat sa 4.5 bilyong dolyar ang nawala sa maong pondo sa gobyerno, diin kapin sa usa ka bilyong dolyar ang giingong nabutang sa mga account nga konektado kang Razak.
Gihatagan siya sa Hari sa Malaysia og conditional pardon aron mahuman sa iyang balay ang nahabiling sentensiya. Apan gisaway kini sa mga kritiko tungod sa kabalaka nga makapaluya sa kampanya batok sa korapsyon.
Nag-atubang pa usab si Razak og apela sa laing 15 ka tuig nga sentensiya tungod sa pagkuha sa dul-an 2.3 bilyong ringgit gikan sa 1MDB fund.
Photo Courtesy: France 24
