Gipangita na sa kapulisan ang usa ka security guard nga gidudahang nalambigit sa pagpatay sa 40-anyos nga pharmacist nga si Marjorie Llaguno sa V. Rama Avenue, Barangay Calamba, Cebu City, kagahapong adlawa, Martes, Nobyembre 10.
Ang kanhing uyab sa biktima nga si Jerome maoy gitudlo sa pamilya nga posibleng responsable sa krimen. Matud sa pamilya, nakadawat una og mga hulga si Llaguno gikan sa maong lalaki, nga giingong mihulga usab sa iyang mga anak.
Gipalig-on usab sa pamilya ang ilang pagduda human nila makita sa CCTV footage ang motorsiklo nga ilang giingong susama sa motorsiklo nga gigamit ni Abella.
Sa maong video, makita ang suspek nga mipusil kang Llaguno samtang nanaog kini gikan sa usa ka pampublikong jeepney, sa wala pa mikalagiw padulong sa Natalio Bacalso Avenue.
Bisan pa niini, wala pa magtudlo og opisyal nga suspek ang kapulisan samtang padayon ang pagsusi sa mga CCTV footage aron mailhan ang responsable ug mahibal-an ang motibo sa pagpamusil.
Gikondena sa Cebu City Police Office ang maong krimen ug gipasalig ni Acting City Director Police Colonel Ricky Sumalde nga patas ug lawom nga imbestigasyon ang ilang himoon aron masiguro nga makab-ot ang hustisya alang sa biktima.
Photo Courtesy: Grabbed from CCTV Footage
