Mipasalig ang National Food Authority (NFA) sa Central Visayas nga igo ang ilang suplay sa bugas aron matubag ang panginahanglan sa mga konsumidor sa rehiyon, lakip na ang posibleng epekto sa Very Strong El Niño.
Kabahin sa ilang pagpangandam ang pagmentinar sa igong buffer stock ug pagpalig-on sa Palay Procurement Program pinaagi sa pagpalit og humay gikan sa lokal nga mga mag-uuma.
Tumong niini nga masiguro ang pagkaanaa sa bugas panahon sa kalamidad ug uban pang emerhensiya.
Matud ni NFA-7 Regional Economist IV ug Buffer Stock Management Head Haiza Klaudine Intano, importante nga adunay igong reserba sa bugas nga mahimong magamit panahon sa kalamidad ug uban pang emerhensiya. Gipalit usab nila ang bahin sa ilang buffer stock gikan mismo sa lokal nga mga mag-uuma.
Base sa datos, mikabat sa 47,054 ka sako sa bugas ang stockpile sa NFA-7, diin 41,704 ka sako ang anaa sa Cebu, 4,131 sa Bohol, 620 sa Negros Oriental ug 599 sa Siquijor.
Gilauman usab sa ahensya ang dugang nga 35,000 ka sako sa bugas sa dili pa matapos ang Nobyembre, diin 20,000 niini igahin sa Sugbo ug 15,000 sa Bohol aron dugang nga mapalig-on ang suplay sa rehiyon.
Gipasalig sa NFA-7 nga magpadayon ang pagpalit og humay ug pagpaabot sa dugang nga kargamento sa bugas aron masiguro ang pagkaandam sa suplay sa Central Visayas, ilabi na sa pag-atubang sa posibleng epekto sa El Niño.
Photo Courtesy: PNA
