Gipunting ni bag-ong Talisay City Police Station Chief PLtCol. Leo Logronio ang pagpalig-on sa police visibility, agresibong operasyon batok sa kriminalidad ug mga programa sa pagpugong sa krimen isip kabahin sa iyang prayoridad sa pagpangulo sa kapulisan sa siyudad.
Matud ni Logronio, importante ang kanunay nga presensya sa mga pulis sa nagkalain-laing komunidad aron mapugngan ang mga kriminal nga kalihokan ug masiguro ang kalinaw ug kahapsay sa Siyudad sa Talisay.
Kabahin usab sa iyang plano ang pagpalihok sa mas agresibong police operations batok sa mga kalapasan sa balaod, lakip ang pagpalig-on sa mga pamaagi sa crime prevention.
Dugang pa niini, tinguha usab sa bag-ong hepe nga palig-onon ang koordinasyon tali sa kapulisan ug sa nagkalain-laing departamento sa lokal nga kagamhanan aron mas epektibong matubag ang mga isyu sa seguridad ug kalinaw sa siyudad.
Pinaagi sa maong mga lakang, gilaoman nga mas mapalig-on ang kooperasyon sa kapulisan ug komunidad sa pagmintinar sa kalinaw ug kahapsay sa Talisay City.
Photo Courtesy: DepEd Talisay City
