Kapin sa 40 ka pilot whales ang nangamatay human ma-stranded sa baybayon sa New Zealand niadtong nakalabay nga adlaw. Sumala sa Department of Conservation (DOC) sa New Zealand, namatikdan ang pundok sa mga balyena sa Ngawi Coast, Cape Palliser sa North Island.
Base sa unang report sa environmental organization nga Project Jonah New Zealand, kapin 20 ka balyena ang unang na-stranded, diin upat niini ang buhi pa.
Nakig-alayon ang grupo sa mga ahensya sa gobyerno ug sa lokal nga tribong Māori aron luwason ang mga buhi pang balyena ug susihon ang ilang kahimtang. Apan niadtong Biyernes, 43 na ka patay nga pilot whales ug nakit-an sa baybayon gikan sa Ngawi hangtod Mangatoetoe.
Matud sa DOC, kasagarang ma-stranded sa baybayon ang maong klase sa balyena, apan wala pa matino ang hinungdan niini.
Photo courtesy: CNN
