Gipahugtan sa Local Government Unit sa Labangan, kauban ang Labangan Municipal Police Station, ang pagpatuman sa “No Helmet, No License, No Plate, No Travel Policy” isip lakang sa pagpalig-on sa disiplina ug kaluwasan sa kadalanan sa Labangan Zamboanga del Sur.
Gipahinumdom sa LGU ang mga motorista nga kinahanglan magsul-ob na sa insaktong helmet ang drayber ug angkas sa motorsiklo, adunay balidong lisensiya ang drayber ug kompleto sa gikinahanglang plaka ang ilang mga motor ug sakyanan sa dili pa mobiyahe.
Ang pagsunod niini dili lamang aron malikayan ang paglapas sa mga lagda sa trapiko, kini usa ka responsibilidad aron mapanalipdan ang kaugalingon, sa mga pasahero, ug ang ubang naggamit sa dalan.
Giawhag usab ang publiko nga makigtambayayong sa mga kapulisan ug tigpatuman sa trapiko, pinaagi sa kanunay nga pagsunod sa mga lagda sa trapiko, bisan duol lamang ang destinasyon, unahon kanunay ang kaluwasan.
Photo courtesy: I LOVE YU LABANGAN
