Nadakpan sa mga personahe sa mga kapulisan ang usa ka 26-anyos nga drayber nga giilang si alyas “Onik,” ulitawo, walay trabaho, gitouhang myembro sa robbery group, lumad nga residente sa Lajor, Nueva Ecija ug temporaryong nagpuyo sa Barangay Cabintan, Ormoc City atol sa gihimong checkpoint operation didto sa Barangay Doña Feliza Mejia, Ormoc City, pasado alas 3:05 sa hapon niadtong nakalabay nga adlaw.
Sumala sa inisyal nga imbestigasyon, gipahunong sa mga kapulisan ang gimaneho niyang sakyanan human namatikdan nga flat ang usa sa mga ligid niini.
Samtang duolon unta sa mga operatiba aron hatagan og citation tungod sa wala pagsul-ob og seat belt, namatikdan sa usa sa mga kapulisan ang usa ka armas nga gibutang taliwala sa lingkoranan sa drayber ug sa gear shifter sulod sa sakyanan.
Narekober gikan sa sakyanan ang usa ka 9mm nga pistola nga hinimo sa China, nga adunay usa ka magazine nga gisudlan sa walo ka buhing bala.
Apan, napakyas ang suspetsado sa pagpakita og balidong lisensya, permit o uban pang legal nga dokumento nga nagtugot kaniya sa pagpanag-iya ug pagdala sa maong armas.
Gidala ang suspetsado, lakip ang nakumpiskang armas ug mga bala, ngadto sa kostodiya alang sa hustong dokumentasyon ug dugang nga imbestigasyon. Samtang, giandam na usab ang mga gikinahanglang dokumento alang sa pagpasaka sa tukmang kasong kriminal batok kaniya subay sa RA 10591 o Comprehensive Firearms and Ammunition Regulation Act.
