Angol ang usa ka 42-anyos nga lalaki human nalambigit sa aksidente sa dalan tali sa dump truck ug motorsiklo sa may Bypass Road, Barangay Mintal, Dakbayan sa Davao niadtong Nobyembre 08, 2026.
Daling mitubag ang mga responder sa Barangay Disaster Risk Reduction and Management Committee Mintal human madawat ang taho kalabot sa maong aksidente. Sa pag-abot sa lugar, nakita ang biktima nga nakaangkon og daghang garas sa tuo nga abaga ug wala nga bitiis, lakip ang kadaot o posibleng pagkabali sa tunga sa iyang tudlo.
Human niini gihatagan gilayon ang biktima ug inisyal nga pagsusi ug gikinahanglang medikal nga pagtabang. Girekomendar usab ang pagdala kaniya ngadto sa ospital alang sa dugang nga pagtambal, apan mibalibad kini.
Gipahimangnoan karon ang publiko ilabina ang mga driver nga mag-amping sa pagmaneho ug musunod sa balaod trapiko aron malikayan ang susamang panghitabo.
Photo courtesy: BDRRMC MINTAL
