Wala na kaikyas pa sa mga otoridad ang usa ka indibidwal human nadakpan atol sa gikasa nga operasyon didto sa Sitio Palina, Barangay Binondo, Baganga, Davao Oriental niadtong Nobyembre 07, 2026.
Ang operasyon gihimo sa mga personahe sa Baganga Municipal Police Station, kauban DCPO Police Station 5, 1st Davao Oriental Provincial Mobile Force Company ug RPSB Cluster 5 nga miresulta sa pagkasikop sa usa ka lalaki.
Ang suspek nadakpan pinaagi sa pagpatuman sa warrant of arrest alang sa kasong Murder ubos sa Criminal Case Number R-DVO-26-00086-CR, nga giisyu sa Presiding Judge sa RTC, 11th Judicial Region, Branch 52, Davao City, pinetsahan niadtong Pebrero 11, 2026 ug walay pyansang girekomendar.
Human sa pagdakop gipasabot ang akusado sa iyang mga katungod pinaagi na sa pinulongan nga iyang nasabtan ug nahibal-an. Human niini, gidala ang dinakpan sa Baganga Health Center alang sa usa ka medikal nga pagsusi ug sa karon gikustodiya na Baganga MPS alang sa tukmang disposisyon.
Photo courtesy: Baganga MPS
