Gipasidunggan sa Environmental Management Bureau (EMB) Region X ang nagkadaiyang local government units (LGUs) ug partner nga mga industriya sa Rehiyon 10 atol sa Environmental Summit 2026 nga gipahigayon niaging Oktubre, didto sa Cagayan de Oro City. Ang maong pasidungog agi’g pag-ila sa ilang walay hunong nga dedikasyon ug paningkamot sa pagpatuman sa responsableng solid waste management, paglig-on sa environmental governance, ug pagpalambo sa mga aksyon batok sa climate change.
Nanguna sa maong pasidungog ang lungsod sa Maramag, Bukidnon nga nag-inusarang nakakuha sa titulo nga “Best LGU” sa Solid Waste Management, samtang giila usab isip mga Top Performing LGUs ang Aloran, Gingoog, Calamba, Mambajao, Kauswagan, El Salvador, Ozamiz, ug Tagoloan. Gawas niini, pormal usab nga gihatagan og pag-ila ang mga munisipyo sa Dangcagan, Quezon, ug Kitaotao sa Bukidnon, tungod sa opisyal nga pagka-aprobar sa ilang 10-Year Solid Waste Management Plan.
Tungod sa maong kalampusan, nagpaabot sa ilang dakong pasalamat ang ahensya ug naglaum nga magsilbi kining inspirasyon sa tanang sektor aron magpadayon ang pagtinabangay sa pagpanalipod sa kalikopan ug sa pagkab-ot sa usa ka malahutayong komunidad.
Photo courtesy: EMB-X/ DENR
