Gipahigayon kagahapon, Nobyembre 9, 2026, sa dakbayan sa Malaybalay ang usa ka mahinungdanong binulan nga convocation program nga gipangunahan sa City Veterinary Office uban sa temang “Service Beyond Boundaries: Elevating Animal Care to the Heart of Public Service.”
Gihatagan og gibug-aton sa maong programa ang kamahinungdanon sa pag-atiman sa mga hayop isip usa ka kinahanglanong bahin sa serbisyo publiko aron maprotektahan ang kahimsog sa katawhan, kalikopan, ug seguridad sa pagkaon.
Nahimong pinasidunggang mamumulong sa okasyon si Dr. Benjamin C. Albarece, Assistant Secretary para sa Ruminants Livestock sa Department of Agriculture (DA) ug kanhi mayor sa Manolo Fortich, kinsa nidiskusyon sa mga nasyonal nga proyekto sama sa beef cattle genetic infusion ug ang pagpalambo sa lokal nga industriya sa kahayupan.
Gawas sa mga panawagan alang sa pagpalig-on sa kooperasyon sa agrikultura, nagpahigayon usab ang lokal nga pangagamhanan ug mga ahensya og pagpasidungog sa nagkalain-laing mga barangay ug buhatan tungod sa ilang talagsaong pasundayag sa rabies prevention, pagpanalipod sa komunidad, ug epektibong implementasyon sa mga programa sa kahimsog.
Natapos ang maong programa pinaagi sa pag-awhag sa tanan nga magpabiling lig-on sa paghatag og tinuod ug malungtarong serbisyo alang sa mas progresibong dakbayan sa Malaybalay.
Photo courtesy: LGU – Malaybalay City
