Magpasiugda pag-usab ang Local Government Unit of Ipil sa mas madasigon ug malipayong pagsaulog sa Pasko pinaagi sa Ipil Christmas Night Market nga mag-abli alang sa soft opening karong Nobyembre 20.
Pinaagi sa maong kalihokan, gitinguhang hatagan og dugang kolor ug kasadya ang kapaskuhan sa lungsod sa Ipil, diin ang mga residente, pamilya, higala ug mga bisita adunay lugar nga mahimong tigomanan aron magkauban ug malingaw.
Gilauman usab nga mahimong dugang atraksyon ang Christmas Night Market, diin ang katawhan makasinati sa kahayag ug kalipay nga dala sa panahon sa Pasko.
Dugang pa niini, usa usab sa tumong sa maong kalihokan ang pagpalig-on sa panaghiusa sa komunidad ug paghatag og oportunidad nga masuportahan ang mga lokal nga negosyante ug magpapatigayon sa lungsod.
Sa ingon, giawhag ang mga residente ug mga bisita nga moapil ug mosuporta sa Ipil Christmas Night Market aron mas mahimong makahuluganon ug malipayon ang pagsaulog sa Pasko karong tuiga.
