Misaka ngadto sa 10.3 porsiyento ang inflation rate sa probinsya sa Zamboanga Sibugay niadtong bulan sa October 2026, nga maoy pinakataas nga natala sa tibuok Zamboanga Peninsula. Kini ang gipadayag sa Philippine Statistics Authority o PSA Zamboanga Sibugay atol sa gipahigayong press conference.
Gipangunahan mismo ni Atty. Richard D. Tabigne, Chief Statistical Specialist sa PSA Zamboanga Sibugay, ang maong press conference diin gihisgutan ang kahimtang sa inflation rate sa probinsya ug ang mga hinungdan nga nakaamot sa pagtaas niini.
Ang 10.3 porsiyentong inflation rate nagpakita sa paspas nga pagsaka sa presyo sa mga produkto ug serbisyo, nga adunay direktang epekto sa adlaw-adlaw nga panginabuhi sa mga lumulupyo, ilabina sa mga pamilya nga adunay limitado nga kita.
Atol sa maong kalihokan, gituki usab ang mga datos nga may kalabotan sa presyo sa mga batakang panginahanglanon ug ang mga sektor nga nakaapekto sa inflation. Gihatagan usab og kahigayonan ang mga representante sa media nga makapangutana aron mas masabtan ang kahimtang sa ekonomiya sa probinsya.
Ang maong datos nagpakita sa mga hagit nga giatubang sa mga konsumidor tungod sa nagkataas nga presyo sa mga palaliton, busa importante ang padayon nga pagmonitor sa inflation aron mahibal-an ang kahimtang sa palaliton ug ang epekto niini sa mga panimalay.
