Nadakpan sa gipahigayong manhunt operation sa kapulisan ang usa ka 38 anyos nga lalaki nga mananagat sa Poblacion, Malangas, Zamboanga Sibugay niaging adlaw.
Naila ang nadakpan residente sa Barangay Kigay, Malangas, ug gialegaran sa paglapas sa Section 5 sa Republic Act 9165 o Comprehensive Dangerous Drugs Act of 2002. Base sa warrant of arrest nga giisyu sa Regional Trial Court Branch 31, Ninth Judicial Region, sa Imelda, Zamboanga Sibugay niadtong Nobyembre 5, 2026, walay piyansang girekomendar alang sa iyang temporaryong kagawasan.
Gipahigayon ang operasyon sa hiniusang pwersa sa Provincial Intelligence Unit sa Zamboanga Sibugay Police Provincial Office, Regional Intelligence Division 9, 2nd Provincial Mobile Force Company, 903rd Regional Mobile Force Battalion ug Malangas Municipal Police Station.
Sa pagkakaron, anaa na sa kustodiya sa Malangas Municipal Police Station ang nadakpan samtang gihulat ang iyang turnover ngadto sa korte nga nag-isyu sa warrant of arrest alang sa tukmang disposisyon.
Ang maong operasyon kabahin sa padayon nga kampanya sa kapulisan batok sa mga wanted person ug sa pagpalig-on sa seguridad ug kalinaw sa probinsya sa Zamboanga Sibugay.
