Arestado ang isang hinihinalang sangkot sa ilegal na droga matapos ang isinagawang buy-bust operation ng mga pulis sa Sitio Lidefan, Barangay Kusiong, Datu Odin Sinsuat, Maguindanao del Norte. Kinilala ang suspek sa alyas na “Warren,” may asawa at residente ng nasabing lugar.
Pinangunahan ang operasyon ni Police Captain Sammy Paning, Deputy Chief of Police ng Datu Odin Sinsuat Municipal Police Station, kasunod ng dalawang linggong pagmamanman sa suspek na umano’y sangkot sa paggamit at pagbebenta ng ilegal na droga.
Ayon kay Paning, ikinasa ang operasyon matapos makumpirma ang mga impormasyong natanggap ng pulisya tungkol sa umano’y ilegal na gawain ng suspek.
Narekober mula sa kaniya ang tatlong sachet ng hinihinalang shabu, mga gamit na may kaugnayan sa ilegal na droga, isang valid identification card at iba pang posibleng ebidensya.
Ayon pa sa pulisya, dati na ring nakulong ang suspek dahil sa kasong murder. Isinagawa ang operasyon sa pakikipagtulungan ng lokal na pamahalaan, kabilang si Vice Mayor Datu Bobsteel Sinsuat.
Posibleng sampahan ang suspek ng kasong paglabag sa Republic Act 9165 o Comprehensive Dangerous Drugs Act of 2002. Kasalukuyan namang nasa kustodiya ng mga awtoridad ang suspek habang inihahanda ang kaukulang dokumento para sa pagsasampa ng kaso.
Photo courtesy: Wikipedia
