Naglatag si Ministry of the Interior and Local Government o MILG-BARMM Minister Jordan Bayam ng apat na pangunahing prayoridad na nais niyang maisakatuparan sa unang 100 araw ng kanyang panunungkulan.
Kasunod ito ng kanyang muling pagkakatalaga bilang pinuno ng nasabing ministeryo.
Sa pulong noong Nobyembre 9, tinipon ni Bayam ang mga opisyal at pinuno ng iba’t ibang tanggapan ng MILG upang talakayin ang kanyang First 100 Days Agenda at ang mga hakbang para agad na maipatupad ang mga nakapaloob dito.
Kabilang sa mga pangunahing layunin ang pagpapabuti sa pamumuno at pamamahala ng MILG, pagpapalakas ng pananagutan ng mga opisyal at mas maayos na paggamit ng pondo ng pamahalaan.
Pangalawa, nais niyang pabilisin ang pagpapatupad ng Bangsamoro Local Governance Code at ihanda ang mga lokal na pamahalaan o LGU sa paglilipat ng ilang tungkulin at responsibilidad mula sa pambansang antas patungo sa lokal na pamahalaan.
Pangatlo, kabilang sa kanyang plano ang pagpapatibay sa kapayapaan at seguridad, gayundin ang paghahanda ng mga komunidad sa posibleng kalamidad sa pamamagitan ng mas maayos na emergency response at disaster management.
At pang-apat, layunin niyang gawing mas mabilis, episyente at makatao ang serbisyo ng mga lokal na pamahalaan sa pamamagitan ng digital governance at mas malapit na ugnayan ng MILG sa mga LGU.
Kasama rin sa mga nakaplanong aktibidad ang pagsasagawa ng Bangsamoro Summit upang bigyang-pagkilala ang mga lokal na pamahalaang may mahusay na programa at makabagong paraan ng paglilingkod sa publiko.
Hinimok naman ni Bayam ang mga opisyal at kawani ng ministeryo na magkaisa at panindigan ang kanilang tungkulin upang maisakatuparan ang mga layuning ito.
Binigyang-diin din niya na mahalaga ang papel ng MILG sa pagpapalakas ng mga lokal na pamahalaan upang matiyak na ang pondo at mga programa ng Bangsamoro Government ay direktang mapapakinabangan ng mamamayan.
Sa kabuuan, nakatuon ang kanyang unang 100 araw sa pagpapahusay ng pamamahala, pagpapatibay ng seguridad at paghahatid ng mas maayos na serbisyo publiko sa buong Bangsamoro Region.
Photo courtesy:MILGBangsamoro
