Nasikop ang 29-anyos nga lalaki human niya dunggaba ang 60-anyos nga drayber sa taxi human nga gitulis duol sa Bagsakan area sa SRP, Barangay Mambaling, Dakbayan sa Sugbo. Ang biktima nga giila sa alyas Beny, taga-Calawisan, Dakbayan sa Lapu-Lapu, nakaangkon og duha ka samad dinunggaban sa tuong kamot.
Matud sa Mambaling Police Station 11, misakay ang suspetsado nga si alyas John sa taxi sa Barangay Basak San Nicolas ug gimandoan ang drayber nga dad-on siya sa Bagsakan. Pag-abot sa may taytayan, gipahibalo niini nga tulison ang drayber ug gikuha ang iyang mga gamit.
Misulay og ikyas ang suspetsado apan gitrangkahan sa drayber ang sakyanan, hinungdan nga gisaksak kini gamit ang kutsilyo. Nadala sa Cebu City Medical Center ang biktima samtang nadakpan dayon ang suspetsado sa mga pulis ug residente. Gilauman nga pasakaan kini og kaso nga frustrated homicide.
Photo Courtesy: Junard “Ahong” Chan| fb page
