Gipaspasan na sa lokal nga kagamhanan sa Consolacion ang ilang kampanya batok sa polusyon human giaprobahan sa Sangguniang Bayan ang Ordinance No. 29, Series of 2026, nga nailang “Consolacion Bring Your Own (BYO) and Single-Use Plastic Reduction Ordinance of 2026,” nga nagtumong sa pagpakunhod sa plastic waste sa lungsod.
Ang maong balaodnon gipangulohan ni Konsehal Fred Herrera, diin nagtinguha kini sa pagdili sa libreng single-use plastic bag sa mga checkout counters, pagdili sa styrofoam nga sudlanan sa mga kan-anan alang sa mga mag-dine in, dili na awtomatikong paghatag sa plastic straw ug kubyertos, gawas lang kun kini pormal nga hangyoon sa kustomer, pagdili sa disposable nga plastik sa tanang opisina sa gobyerno atol sa ilang mga tigum ug aktibidad.
Tungod niini, giawhag sa lokal nga kagamhanan ang mga Consolacionanon nga batasanon ang pagdala og kaugalingong reusable bags, tumblers, lunch boxes, ug uban pang eco-friendly nga sudlanan sa pagkaon.
Alang sa mga establisemento ug indibidwal nga mosupak, nagpahamtang ang LGU og mga silot nga alang sa unang paglapas, usa ka written warning ug environmental orientation, samtang sa ikaduhang paglapas, aduna na’y multa nga usa kalibo kapesos ug sa ikatulong paglapas, multa na nga 2,500 ka pesos.
Photo Courtesy: Wikipedia
