Usa ang namatay human nahagsa sa suba ang usa ka helicopter nga gigamit sa operasyon batok sa sunog sa kalasangan sa South Kalimantan, Indonesia.
Matud sa disaster mitigation agency sa Indonesia, usa ka Indonesian crew member nga giila nga si Yayan Supyansuri ang namatay. Nakaluwas usab ang duha pa ka sakay sa helicopter nga mga langyaw nga taga-Australia ug New Zealand ug gidala sa ospital alang sa pagtambal.
Nagpadayon ang imbestigasyon sa aksidente, apan gipasalig sa ahensya nga magpadayon ang operasyon batok sa mga sunog. Sa video nga mikaylap sa social media, makita ang helicopter nga naglutaw ibabaw sa suba gamit ang sudlanan sa tubig nga pangpalong sa kalayo sa wala pa kini miunlod sa tubig.
Ang nahagsang Super Puma H-225 gipanag-iya sa kompanyang gisuholan alang sa operasyon sa pagpalong sa sunog. Nahitabo kini pipila lang ka adlaw human laing helicopter ang nahagsa sa Central Kalimantan, diin tulo ka tripulante ang namatay.
Sulod sa pipila ka bulan, nag-atubang ang Indonesia sa dagkong sunog sa kalasangan ug peatlands nga mas nigrabe tungod sa uga nga panahon tungod sa El Niño. Ang aso gikan sa mga sunog mikatap sa Indonesia, Malaysia ug Singapore, hinungdan sa kabalaka sa panglawas tungod sa polusyon sa hangin ug pagdaghan sa mga kaso sa sakit sa respiratory.
Photo Courtesy: BBC News
