Kapin sa 20 ka tawo ang nasamdan human maigo sa kusog nga linog nga may magnitude 5.7 sa Shizuoka Prefecture sa sentro sa Japan sayong kabuntagon sa adlawng Dominggo, Nobyembre 8.
Sumala sa Japan Meteorological Agency, nakaabot sa upper 5 ang intensity sa linog sa sukdanan nga zero hangtod pito sa Chita City, Aichi Prefecture, duol sa utlanan sa Shizuoka. Walay namatikdang hulga sa tsunami. Dugang pa sa ahensya, karon pa lamang nasinati pag-usab sa Aichi ang ingon kakusog nga linog human sa 30 ka tuig.
Nakaabot usab sa lower 5 ang intensity sa pipila ka bahin sa Aichi, Shizuoka, Gifu ug Nagano. Gibana-bana sa ahensya nga anaa sa giladmon nga 41 kilometros sa kasadpang bahin sa Shizuoka ang sentro sa linog. Sumala sa lokal nga awtoridad sa Higashiura, Aichi, naputol ang suplay sa tubig sa pipila ka lugar, samtang adunay mga naitalang mas huyang nga aftershocks.
Photo courtesy: Japan Times
