Upat na ka tawo ang namatay samtang daghan pang uban ang naangol human nagbangga ang duha ka tren sa Egypt, sumala sa mga awtoridad sa maong nasud.
Nahitabo ang banggaan sa distrito sa Al-Ayyat, lalawigan sa Giza, mga 52 kilometros sa habagatan sa Cairo, diin ang usa ka tren nga gikan sa Giza padulong sa Fayoum mibangga sa likod nga bahin sa laing tren nga nagbiyahe gikan sa Cairo padulong sa Aswan.
Tungod sa kusog sa impact, pipila ka mga bagon sa tren ang nangaguba ug nahisalaag gikan sa riles, hinungdan nga daghang pasahero ang naipit ug naangol. Gipadala sa mga otoridad ang kapin 70 ka ambulansya aron pagtabang sa operasyon sa pagluwas ug pagdala sa mga biktima ngadto sa nagkaduol nga mga ospital.
Samtang, gimandoan ni Egyptian President Abdel Fattah el-Sisi ang daliang imbestigasyon aron matino ang hinungdan sa aksidente ug mapanagot ang bisan kinsa nga mapamatud-ang adunay kapabayaan.
Photo courtesy: Tvcnewsng
