Gisentensiyahan sa Mombasa High Court sa Kenya ug 200 ka tuig nga pagkabilanggo ang kontrobersyal nga cult leader nga si Paul Mackenzie, ang founder sa Good News International Church, may kabahin sa pagkapatay sa 191 ka mga tawo—diin 190 kanila mga bata—pinaagi sa forced fasting sulod sa Shakahola Forest.
Subay sa nakaplagan sa korte nga gipangulohan ni Lady Justice Diana Kavedza, giilad ug gipatuo ni Mackenzie ang iyang mga sumusunod nga ang pagpuasa makapaduol kanila sa Ginoo sa dili pa matapos ang kalibutan. Gibahin ang maong sentensiya sa 100 ka tuig alang sa mga namatay sa kagutom ug 100 ka tuig alang sa mga biktima nga namatay pinaagi sa direktang pagpatay o homicide, diin adunay mga naggwardya aron pugngan ang kinsaman nga mosulay sa pag-ikyas o pagkaon.
Bisan pa man sa maong 200 ka tuig nga pagkabilanggo, padayon pa gihapon nga giatubang ni Mackenzie ug sa iyang mga kauban ang uban pang dugang nga kasong kriminal sama sa terrorism ug manslaughter.
Nagpabilin nga usa sa pinakadakong trahedya sa kasaysayan sa Kenya ang maong “Shakahola Forest Massacre” tungod sa kapin 400 ka mga natala ug nakalotang mga patayng lawas sa maong dapit, samtang ang mga kalalakihan sa maong sekta mao ang gipahipos sa mga patayng lawas sa mga bata ug kababayen-an sa dili pa mamatay.
Photo courtesy: African folder
