Nakaplagang wala na’y kinabuhi ang 58-anyos nga lalaki sa may sapa nga gibanabanang 200 ka metros ang kalayo gikan sa iyang gipuy-an sa Purok 9, Barangay Magsaysay, Kibawe, Bukidnon niadtong Nobyembre 4, 2026, pasado alas 11:55 sa buntag. Miresponde ang Kibawe Municipal Police Station human nakadawat og tawag gikan sa usa ka barangay kagawad sa maong dapit.
Sa gihimong pagsusi sa kapulisan, nakuha sa duol sa biktima ang usa ka itom ug puti nga plastik nga balde, tsinelas, ug usa ka 4-liter nga galon, diin walay nakitang mga timailhan sa foul play.
Sumala sa igsuon ug bayaw sa biktima, katapusan kining nakit-an niadtong Oktubre 30 ug ila kining gipangita human sa pipila ka adlaw nga pagkawala, hangtod nga napalgan kini sa sapa diin kasagaran magkuha og tubig alang sa adlaw-adlaw nga gamit. Gidugang sa iyang pamilya nga wala kini kaaway o bisyo, apan aduna kini sakit nga epilepsy o mas nailhang “patol.”
Gidala na ang patayng lawas sa biktima ngadto sa Kibawe Rural Health Unit (RHU) alang sa post-mortem examination aron masuta ang eksaktong hinungdan sa iyang kamatayon.
Photo courtesy: Kibawe Municipal Police Station
