Nadakpan sa joint checkpoint operation sa Midsayap Municipal Police Station (MPS) ug Regional Highway Patrol Unit 12 Special Operations Team ang usa ka 42-anyos nga drayber nga giila sa alyas “Lau” human misulay kini paglikay sa checkpoint sa National Highway, Barangay Sadaan, Midsayap, Cotabato, pasado alas-5:30 sa hapon niadtong Nobyembre 5, 2026.
Narekober gikan sa iyang gimanehong Mitsubishi closed van ang tulo ka ream ug 73 ka kahon sa New Khoor nga sigarilyo nga walay gikinahanglang graphic health warnings, nga mokabat sa P3,125,799.04 ang kinatibuk-ang kantidad. Wala usab makapakita ang drayber og legal nga dokumento alang sa sakyanan ug mga kargamento.
Base sa koordinasyon sa Bureau of Customs, gikumpirma nga mga smuggled goods ang mga nakumpiskang sigarilyo, hinungdan nga dugang nga kasong kalapasan sa Republic Act 10863 o Customs Modernization and Tariff Act ug RA 10643 o Graphic Health Warning Law ang ipasaka batok sa drayber.
Gidakop usab siya tungod sa paglapas sa Article 151 sa Revised Penal Code o Resistance and Disobedience to a Person in Authority. Gidala na sa Midsayap MPS ang suspek ug mga ebidensya alang sa dokumentasyon ug hustong disposisyon.
