Gitutokan ang hustong pag-atiman sa rubber plantation ug saktong pamaagi sa pag-tapping aron masiguro ang maayong pagtubo sa mga rubber tree ug mapadaghan ang produksyon sa latex nga panginabuhian sa mga mag-uuma.
Gipasabot ni Jennepher A. Bade, Science Research Specialist II, nga importante ang regular nga paglimpyo sa palibot sa rubber plantation, pagkuha sa mga sagbot, pag-abono ug pagmonitor sa kahimtang sa mga kahoy. Matud pa niya, ang husto nga pag-atiman makatabang aron malikayan ang mga sakit ug peste nga mahimong makaapekto sa pagtubo ug produktibidad sa rubber trees.
Samtang, gipatin-aw usab ni Ariel O. Vilar, Supervising Science Research Specialist, ang hustong pamaagi sa rubber tapping o pagkuha sa latex gikan sa kahoy. Kinahanglan nga sakto ang anggulo, giladmon ug direksyon sa paghiwa sa panit sa rubber tree aron dili madaot ang kahoy ug mapadayon ang maayong pag-agas sa latex.
Gipasabot usab nga ang sayop nga pag-tapping, ilabi na ang sobra ka lawom nga paghiwa, mahimong makasamok o makadaot sa mga tisyu sa kahoy ug makaapekto sa sunod nga produksyon. Tungod niini, gikinahanglan nga ang mga rubber tapper makakat-on ug mosunod sa saktong teknik ug iskedyul sa pagkuha sa latex.
Pinaagi sa hustong pag-atiman sa rubber plantation ug disiplina sa pag-tapping, gilauman nga mapalambo ang kalidad ug kadaghanon sa produksyon, mapalugway ang kinabuhi sa mga rubber tree ug mapalambo ang kita sa mga rubber farmer. Ang kahibalo ug pag-aplikar sa saktong pamaagi importante aron mahimong malungtarong panginabuhian ang rubber farming.
Photo courtesy: Making.com
