Gipahigayon sa Lokal nga Kagamhanan sa Don Carlos, Bukidnon uban sa Bukidnon Coffee Tribe ang paglunsad sa ikatulong edisyon sa Lakeside Coffee Festival and Flea Market sa pamosong Pinamaloy Lake sa lungsod sugod niaging Nobyembre 04, hangtod sa Nobyembre 22, 2026
Nagtumong ang maong kalihokan sa pagselebrar sa industriya sa kape ug pagpasundayag sa kultura, talento, ug oportunidad sa lokal nga komunidad diin abli ang nagkadaiyang flea market, coffee talks, ug mga kompetisyon alang sa pag-andam ug pagtimbre sa kape.
Gidayeg ni Governor Rogelio Roque ang LGU Don Carlos sa padayong pagsuporta sa lokal nga industriya aron mas mapalambo ang sektor sa agrikultura ug turismo pinaagi sa pagpalig-on sa koneksyon sa mga mag-uuma, negosyante, ug konsumidor. Samtang gihimug-atan usab ni DTI Bukidnon Provincial Director Famelah Racquel D. Villanueva ang importansya sa pagtinabangay alang sa mas malambuon ug inklusibo nga ekonomiya sa probinsya.
Nagsilbing sentro sa kalihokan ang Pinamaloy Lake nga nagpakita sa dako nga potensyal sa rehiyon sa paningkamot sa coffee tourism. Gawas pa niana, naghatag usab ang maong festival og plataporma sa kapin 30 ka mga lokal nga mag-uuma sa kape nga nagikan pa sa nagkalain-laing lungsod ug dakbayan sa tibuok lalawigan sa Bukidnon.
Photo courtesy: LGU Bukidnon
