Giatubang karon sa minilyong residente sa Delhi, India ang grabe nga hulga sa panglawas tungod sa misaka nga lebel sa polusyon sa hangin nga natala na sa “very poor” nga kategorya, diin ang mga pino nga particulates nga PM2.5 miabot sa lebel nga makadaot ug makabara sa baga.
Tungod sa maong sitwasyon, gipatuman sa mga awtoridad ang Stage II sa Graded Response Action Plan (GRAP). Ubos sa maong patakaran, gipaspasan ang halapad nga pagpanglimpyo ug pagbisbis sa mga karsada aron makunhuran ang abog, samtang gihugtan usab ang paglimitar ug pagkontrol sa dagan sa mga sakyanan.
Nisamot pa ang kabalaka sa maong dapit samtang nagsingabot ang tradisyonal ug dakong pagsaulog sa Diwali festival. Gilauman sa mga awtoridad nga mas mosaka ug mas mosamot pa ang lebel sa polusyon sa mga sunod nga adlaw tungod sa gilauman nga paggamit ug pagpabuto og mga fireworks atol sa maong kasaulogan.
Photo courtesy: IndianExpress
