Mobisita si Thai Foreign Minister Sihasak Phuangketkeow sa Myanmar sa Nobyembre 12, pipila ka adlaw sa wala pa ang ASEAN Summit sa Manila gikan Nobyembre 16 hangtod 18, diin paningkamotan sa Thailand nga ma-normalize ang relasyon sa maong nasud.
Ang pagbisita mahitabo samtang nagkataas ang tensiyon sa utlanan sa duha ka nasud. Matud sa Bangkok, ang panagsangka sa militar sa Myanmar ug mga rebeldeng etniko nakadaot sa mga kabtangan ug nakapasamad sa usa ka sibilyan sa Thailand.
Matud ni Sihasak, gustong madungog sa ilang gobyerno ang labing bag-ong baroganan sa Myanmar sa dili pa ang summit. Gilauman usab nga hisgotan sa ASEAN ang sitwasyon sa Myanmar ug ang posibleng pag-apil niini sa mga miting sa rehiyon.
Wala na imbitara ang mga lider sa Myanmar sa high-level ASEAN meetings sukad sa kudeta militar niadtong 2021 nga misangpot sa civil war. Gilauman nga magpadala ang Myanmar og senior civil servant sa summit sa Manila.
Photo Courtesy: Reuters
