Gipanghimakak sa North Korea ang akusasyon sa Estados Unidos nga nalambigit kini sa pagpangawat og kapin sa 6 ka bilyong dolyar nga cryptocurrency assets gikan sa Binance. Sa pahayag nga gipatik sa Korean Central News Agency, gitawag ni Kim Yo Jong, igsoon sa lider sa North Korea nga si Kim Jong Un, nga “absurd rhetoric” o walay pulos nga alegasyon ang pahayag sa US Federal Bureau of Investigation (FBI). Matod pa niya, usa kini ka seryosong politikal nga pagpanghagit ug pagsulay sa Washington nga ipakita ang North Korea isip usa ka cyber-criminal state.
Una nang mipahibalo ang FBI nga ang mga hacker sa North Korea nga nailhang “TraderTraitor” ang responsable sa pagpangawat sa kapin sa 6 ka bilyong dolyar nga virtual assets gikan sa Binance niadtong Oktubre 29. Sumala sa ahensya, nasuta nga gi-convert sa mga nalambigit ang pipila sa gikawat nga assets ngadto sa Ether ug gilauman nga moagi pa kini sa ubang proseso sa money laundering. Giawhag usab sa FBI ang mga cryptocurrency companies ug virtual asset service providers nga babagan ang mga transaksyong konektado sa giila nilang blockchain addresses.
Samtang, giinsistir ni Kim nga ang akusasyon nagpakita lamang sa giingong mapintas nga pagtagad sa Washington batok sa Pyongyang. Padayon usab nga nakigtambayayong ang Binance sa mga awtoridad ug mga kauban sa cryptocurrency industry aron masubay ug mabawi ang mga gikawat nga digital assets.
Photo courtesy: Korea Summit Press Pool/Getty Images
