Gipahibalo ni Board Member Rommel Maslog atol sa ika-61 nga regular session sa Sangguniang Panlalawigan nga magpahigayon sila og budget hearing ug budget deliberation sa Nobyembre 16 hangtod 20 ug Nobyembre 26 hangtod 28, 2026, alang sa 2027 provincial budget.
Gibanabana nga mokabat sa P4.8 bilyong piso ang ilang gikinahanglang badyet, apan ipahiangay lamang kini sa kita sa lalawigan aron malikayan nga maapektuhan ang ubang mga proyekto.
Gitinguha usab sa konseho nga mahuman ang budget deliberation sa dili pa ang Disyembre 30, 2026, aron malikayan ang pagpatuman pag-usab sa miaging badyet o reenacted budget.
Gipasalig usab ni Maslog nga magpabiling prayoridad ang mga batakang serbisyo sama sa mga ospital, samtang ang mga bag-ong programa lamang ang susihon ug ipahiangay subay sa makaya sa badyet.
Dugang pa niya, dili gusto sa konseho nga kutob lamang sa papel ang badyet, kondili ilang tinguha nga direktang mapahimuslan kini sa katawhan pinaagi sa pagtuman sa mga gisaad nga programa ug proyekto sa kagamhanan.
Photo courtesy: Flag color codes
