vGipagawas ni Pangulong Ferdinand “Bongbong” Marcos Jr. ang Executive Order No. 130 nga nagtakda og bag-ong mga lagda bahin sa pagsuspenso ug pagpadayon sa face-to-face classes, mga kalihokan sa eskwelahan, ug on-site work sa mga pampubliko ug pribadong eskwelahan. Ubos sa maong mando, gitugotan ang mga eskwelahan nga mosuspenso sa face-to-face classes base sa aktuwal nga risgo sa kaluwasan sa mga estudyante ug kawani, kon walay kasamtangang suspensyon nga gipahibalo sa nasyonal o lokal nga pangagamhanan.
Gitugotan usab sa mando ang mga eskwelahan nga mopadayon sa face-to-face classes bisan adunay suspensyon nga gipatuman sa ilang lugar. Apan, kinahanglan una nilang masiguro nga luwas na ang pagbalik sa mga estudyante ug kawani sa eskwelahan, ug makuha ang pagtugot sa hingtungdang local chief executive. Gipatin-aw usab nga ang pagsuspenso sa face-to-face classes dili nagpasabot nga hingpit nang mohunong ang pagkat-on, busa giawhag ang mga eskwelahan nga ipadayon ang edukasyon pinaagi sa ubang pamaagi kon mahimo.
Gi-amendahan usab sa Executive Order No. 130 ang Executive Order No. 66, series of 2012, nga naglatid sa mga lagda sa pagsuspenso sa klase ug trabaho sa mga opisina sa gobyerno panahon sa kalamidad ug grabeng kahimtang sa panahon. Nahinumdoman nga kaniadto, giawhag sa Department of Education (DepEd) ang mga lokal nga pangagamhanan nga mahimong mas espesipiko ug maampingon sa pagdeklarar og suspensyon aron mapanalipdan ang oras sa pagkat-on sa mga estudyante.
Photo courtesy: PCO
