Gisugyot ni House Deputy Majority Leader ug Quezon City 5th District Representative PM Vargas nga obligahon ang tanang pampubliko ug pribadong eskwelahan sa nasod nga magbutang og closed-circuit television (CCTV) systems ug magpatuman og komprehensibong security plans.
Gilatid kini sa iyang gisang-at nga House Bill No. 11575 o “Campus Security Act” nga nagtumong sa pagpugong sa kapintasan, bullying ug uban pang hulga sa kaluwasan sulod sa mga eskwelahan.
Gibase ni Vargas ang iyang sugyot sa report sa Department of Education (DepEd) nga nagpakita nga wala pay katunga sa mga publikong eskwelahan ang adunay nag-andar nga CCTV cameras ug security guards.
Gipunting usab niya ang resulta sa 2024 Philippines Global School-based Student Health Survey diin 35.3 porsiyento sa mga estudyanteng nag-edad og 13 hangtod 17 anyos nakasinati og away o kadaot sulod sa eskwelahan, samtang 30.2 porsiyento ang nabiktima sa bullying.
Matud ni Vargas, dako nga bahin sa panahon sa mga bata ang ilang gigugol sa eskwelahan nga layo sa paggiya ug proteksiyon sa ilang mga ginikanan, busa kinahanglan masiguro ang ilang kaluwasan aron makapokus sila sa pagtuon.
Photo Courtesy: Graduate Programs for Educators
