Patay ang usa ka motorista human mibangga ang iyang gimanehong Honda motorcycle sa Nissan Urvan samtang misulay og overtake sa usa ka cargo truck sa National Highway, Barangay Binlod, lungsod sa Argao.
giila ang biktima sa alyas nga Earl, hingkod na ang panuigon ug residente sa Barangay Tungkop, lungsod sa Minglanilla. Gidala pa kini sa Isidro Kintanar Memorial Hospital apan gideklarar nga dead-on-arrival tungod sab sa grabeng mga samad nga naangkon sa iyang lawas.
Samtang, ang Nissan Urvan nga iyang nabanggaan gimaneho ni alyas Victor, 52 anyos, minyo ug residente sa Upper Lipata, Minglanilla.
Matod sa Argao Municipal Police Station, ang van nagbiyahe paingon sa amihanan gikan sa habagatang bahin sa Sugbo, samtang ang motorsiklo nagpadulong sa habagatan gikan sa amihanan.
Base sa imbestigasyon ug CCTV footage, kusog ang dagan sa motorsiklo ug nagsunod kini sa usa ka cargo truck sa wala pa misulay og overtake. Apan atol sa pag-overtake, giingong naigo sa motorsiklo ang likod nga bumper sa truck, hinungdan nga nawad-an og kontrol ang drayber.
Tungod niini, miswerve ang motorsiklo ngadto sa pikas lane diin nagpadulong ang Nissan Urvan, nga miresulta sa kusog nga panagbangga. Padayon pang gipahigayon sa kapolisan ang imbestigasyon sa maong insidente.
Photo Courtesy: Decemay Padilla
