Padayon karon ang pagpangapod-apod sa nag-unang ayuda alang sa mga biktima sa sunog sa Sitio Lawis, Alaska, Barangay Mambaling syudad sa Sugbo, human miulbo ang kalayo niadtong Nobyembre 1, 2026.
Miabot sa 513 ka indibidwal gikan sa 128 ka pamilya ang naapektuhan sa maong insidente, diin daghang mga residente ang nawad-an sa ilang pinuy-anan human sa kalayo nga giingong nagsugod sa kandila nga gihalad alang sa Kalag-Kalag.
Personal nga nahinabi sa Juander Radyo Cebu News Team si SK Chairman sa Barangay Mambaling Edoy Teves ug matud niya tungod sa kadaghan sa mga apektadong residente, nabahin ang mga biktima ug temporaryong gipahimutang sa nagkalainlaing evacuation centers aron masiguro ang hapsay ug luwas nga pagpasilong kanila.
Samtang, gipahibalo nga sa Barangay Satellite Office sa Mambaling ipahigayon ang pagkuha sa mga ayuda aron malikayan ang kagubot ug masiguro ang hapsay nga pagpangapod-apod niini.
Gihimo usab kini nga pamaagi aron dili maghuot ang mga residente, ilabina sa pagbalik sa normal nga mga kalihokan ug klase sa mga estudyante.
Photo Courtesy: File Photo
