Gipahayag sa lending ug financing companies nga Tala Philippines ug Global Dominion ang ilang suporta sa gisugyot nga mga lagda sa Securities and Exchange Commission (SEC) nga magkinahanglan og akreditasyon ug mas hugot nga pagdumala sa mga third-party debt collection agencies. Tumong niini nga mapalig-on ang accountability ug mapanalipdan ang mga nangutang batok sa dili patas nga pamaagi sa pagpangolekta og utang.
Ubos sa gisugyot nga lagda, ang mga collection agencies nga adunay akreditasyon lamang gikan sa SEC ug ang internal collection agents sa mga lending companies ang tugotan sa pagpangolekta og utang. Ilakip usab ang mga akreditadong ahensya sa publikong registry aron masusi sa mga nangutang ang ilang lehitimong kahimtang. Naglatid usab ang SEC og multa nga P60,000 hangtod P200,000 alang sa dili patas nga pagpangolekta, samtang ang mga kompanya nga mogamit og dili akreditadong ahensya mahimong pagmulta hangtod P2 milyon.
Samtang, gisuportahan sa Tala ug Global Dominion ang maong lakang tungod sa gilauman nga mapalambo niini ang patas nga pagtratar ug transparency sa mga nangutang. Gipasiugda usab sa Global Dominion nga padayon nilang gimonitor ang ilang collection partners aron masiguro ang pagsunod sa mga regulasyon sa SEC ug data privacy. Ang balik-balik nga paglapas sa gisugyot nga mga lagda mahimong mosangpot sa pagbawi sa akreditasyon o pagtugot sa pag-operate sa mga kompanya.
Photo courtesy: Aldrine Ballesteros/ Business World
