Gipasiugda ni Senator Francis “Kiko” Pangilinan ang hugot nga pagbantay ug pagpahamtang sa angay nga silot batok sa mga hoarder, mga abusado sa presyo ug mga kartel sa pagkaon tungod sa hulga sa grabeng El Niño nga mahimong makapakunhod sa produksiyon sa agrikultura ug makapamahal sa mga batakang panginahanglanon.
Isip chairman sa Senate Committee on Agriculture, nanawagan si Pangilinan sa Department of Trade and Industry (DTI), Department of Agriculture (DA), Price Coordinating Council (PCC) ug uban pang hingtungdang ahensiya nga palig-onon ang pagmonitor sa mga merkado ug siguruhong ipatuman ang price freeze sa mga lugar nga gideklarar nga adunay state of calamity. Ubos sa Republic Act 7581 o Price Act, nga giusab pinaagi sa Republic Act 10623, awtomatikong ipatuman ang price freeze sa mga batakang palitonon sa mga lugar nga gideklarar nga adunay state of calamity.
Gihatagan og gibug-aton ni Pangilinan nga kinahanglan imbestigahan ug pasakaan og kasong kriminal ug administratibo ang mga indibidwal ug kompanyang nalambigit sa pagtago sa suplay, pagpahimulos sa pagsaka sa presyo ug pagmaniobra sa merkado. Matod niya, dili lamang ang mga tindero ang angay manubag, kondili lakip usab ang mga tag-iya sa dagkong negosyo nga anaa sa likod sa maong mga sindikato.
Matod pa sa senador, kinahanglan siguruhon sa gobyerno nga adunay igo nga suplay sa pagkaon ug hugot nga bantayan ang mga presyo niini aron mapanalipdan ang mga konsumidor, ilabi na karon nga adunay hulga sa El Niño nga mahimong dakong epekto sa produksiyon sa agrikultura.
Photo courtesy:Reuters
