Siyam ka tawo ang namatay human mihagsak ug nasunog ang usa ka pribadong Learjet 60 sa usa ka residential area sa Palm Beach County, Florida, United States niadtong Domingo, Nobyembre 1. Gikumpirma ni US Transportation Secretary Sean Duffy nga walay nakaluwas sa tanang sakay sa eroplano. Matod sa Federal Aviation Administration (FAA), nahitabo ang aksidente pasado alas-12:50 sa udto, lokal nga oras, duol sa Cresthaven, Florida.
Gikan sa Austin-Bergstrom International Airport sa Texas ang eroplano ug padulong unta sa North Eleuthera Airport sa Bahamas. Apan, nasunog kini dihang miigo sa yuta, nga nagbilin og dakong lungag ug nagkatag nga mga tipak sa nahagsang eroplano sa palibot sa lugar.
Samtang, gibakwit ang kapin 600 ka residente sa usa ka duol nga mobile home community tungod sa kadaot nga nahimo sa pagkahagsa sa eroplano. Matod sa mga opisyal, wala pay gikatahong namatay o nasamdan sa mga tawo nga anaa sa yuta atol sa insidente.
Photo courtesy: PBS News
