Siyam ka tawo ang namatay samtang 40 pa ang nasamdan human sa pagpamusil sa mga residente nga nagtigom aron magbangotan sa pagkamatay sa usa nilang kauban sa baryo sa Hmoud, probinsya sa Karak, Jordan, niadtong nakalabay nga adlaw.
Sumala sa mga saksi, usa sa mga armadong suspek ang nagdala og AK-47 assault rifle ug nagpabuto sulod sa pipila ka minuto. Matod sa laing saksi, ang mga suspek matud pa nagtumong sa nataran sa usa ka simbahan diin nagtigom ang kadaghanan sa mga tawo. Gikumpirma sa Public Security Agency sa Jordan nga padayon pang gipangita sa mga awtoridad ang mga suspek, kansang mga identidad wala pa mailhi. Giila usab sa ahensiya ang pag-atake isip usa ka teroristang aksiyon nga gitumong batok sa mga Kristiyano.
Sa laing bahin, misaad si King Abdullah sa Jordan nga hugot nga aksiyon ang ipahamtang batok sa mga responsable sa pag-atake. Sa iyang pahayag sa social media platform nga X, matod niya, “Bililhon ang dugo sa mga Jordano, ug labing silotan ang mga molapas batok sa ilang nasod.” Si Jordan Prime Minister Jafar Hassan miingon usab nga nagtinabangay na ang nagkalainlaing ahensiya sa gobyerno aron masuta ang insidente, mapanubag ang mga suspek, ug makab-ot ang hustisya alang sa mga biktima.
Photo courtesy: BBC
