Gipasiugda ni Board Member Rommel B. Maslog ang panginahanglan sa pag-imbestigar sa mga reklamo sa giingong ilegal nga pagbaligya sa yuta sa boundary sa Claveria ug Gingoog City, Misamis Oriental.
Atol sa ika-61 nga regular session sa Sangguniang Panlalawigan, iyang gibutyag nga adunay mga sumbong bahin sa yuta nga gibaligya sa kapin sa usa ka higayon, mga luna nga gibaligya sa mga dili tag-iya, ug mga grupo nga namaligya og yutang wala nakapangalan kanila.
Gihisgutan usab ang plano nga imbestigahon ang mga reklamo uban sa DENR, NCIP ug mga opisyal sa barangay nga may kalabotan sa lugar karong Nobyembre 4, 2026.
Tumong sa Panlalawigan nga mapanalipdan ang katungod sa mga Indigenous Peoples o Lumad pinaagi sa pagpahigayon og committee hearing aron maklaro ang isyu ug matino ang mga lakang nga angay buhaton.
Photo courtesy: Google Earth
