Gimando sa Provincial Disaster Risk Reduction and Management Office (PDRRMO) sa Bukidnon sa tanang lokal nga kagamhanan ang pag-activate sa ilang Emergency Operations Center ug ang pagbutang niini sa Blue Alert status isip pagpangandam sa Undas 2026.
Matud ni PDRRMO Acting Administrative Officer Aizel Joy Caganan, nagpagawas na ang probinsya og memorandum alang sa mga LGU aron masiguro ang padayong pagmonitor sa kahimtang sa matag lugar, pagpakaylap sa mga pahimangno sa pag-ulan, ug ang pagsumite sa mga situational report sa panahon sa pag-obserbar sa Undas aron dali nga matubag ang unsa mang emerhensiya.
Gipasabot usab ni Caganan nga fully prepared ang PDRRMO sa pagresponde sa mga medikal nga emerhensiya, lakip na ang mga tawo nga malipong ug ang mga aksidente sa sakyanan samtang nagdagsa ang mga tawo sa sementeryo.
Samtang, ang pagpatuman sa kalinaw, kaangayan, ug seguridad sa matag dapit atol sa maong okasyon nagpabilin nga nag-unang responsibilidad sa Philippine National Police (PNP).
Photo courtesy: BUKIDNON -PDDRMO
