Gipalig-on sa Police Regional Office 11 ang kampanya batok sa illegal nga droga ug ang pagdakop sa mga wanted nga indibidwal pinaagi sa sunod-sunod nga operasyon sa rehiyon.
Sumala sa report sa PRO 11, gikan alas 6:00 sa buntag niadtong Oktubre 27 hangtod alas 5:59 sa buntag niadtong Oktubre 28, 2026, nakapahigayon ang kapulisan og 13 ka operasyon batok sa illegal nga droga nga miresulta sa pagkasikop sa 15 ka suspek. Nakumpiska usab ang 74.79 gramos sa gituohang shabu ug laing upat ka gramo sa marijuana nga adunay kinatibuk-ang kantidad nga P509,052.00.
Samtang, 13 usab ka operasyon ang gihimo alang sa pagdakop sa mga wanted nga indibidwal, nga miresulta sa pagkasikop sa duha ka Municipal Level Most Wanted Persons ug 11 ka uban pa.
Gipadayon usab sa PRO 11 ang kampanya batok sa mga loose firearms, illegal nga sugal, illegal logging, paglapas sa lokal nga mga ordinansa, ug smuggling isip kabahin sa ilang paningkamot sa pagmintinar sa kalinaw ug kahusay sa rehiyon.
Photo courtesy: PRO 11
